على فكره عادى / لما تضحك / وانت من جوه حزين
المهم ماتنكسرش / وتستكين
عدى فوق الهم وانتصب / واقنع جنابك أنك سعيد
ومتنكسفش / من دمك اللى سايل / فتقعد تعدد زى الحريم
ايه يعنى لما الوطن
_ فترة زمن _
يمشى بطال
أو جرح من الحبيبه يوجعك
بعدد ذراة الرمال
مشكلتك انك بتفلسف مأساتك
وبتعمل من أحلامك
مليون موال
على فكره عادى لما تقتنع
ان الناس مش هتصدقك
رغم ان قلبك كتاب مفتوح
وعينيك بوابه للحقيقه
ضحكتك صافيه وبريئه
وغنوتك مهره جموح
على فكره عادى جدا
ان الجميع يخونك
والصبح يبدل ملامحه
فينطمس نور النهار سواد
هو انت فاكر بالأغانى يبتهج الربيع
او بالمبادئ رح تكسب الجميع
فوق ياغبى
انت ف الزمن الوضيع
زمن اللى معاه يشترى
واللى ممعهوش يضيع
على فكرة عادى جدا ..
ولا فيه غرابه
انك تطنش ..تفرفش
تعيش لنفسك .. وتنسى
حتى اسمك .. رسمك
وش الطيابه
بس اللى على فكره مش عادى
انك تعيش
والحلم ف ايديك
... قتيل ؟!
المشاركات
0 التعليقات :
إرسال تعليق