فصيدة " نصف نبى "

...........................................
اللى انقتل مش بلطجى
اللى انقتل نصف نبى
كنا زمان ع القهوه نرمى زهرنا
وف الشوارع نجرى نحضن حلمنا
وصوتنا عمره ماانخرس
ولا كان بيرهبنا الحرس
كان الوطن مطلبه ... ومطلبى
اللى انقتل مش بلطجى
اللى انقتل نصف نبى
كان ف الميدان واقف تمام ... شايل العلم
وكان جسور .. زى النسور
مخلوق يثور .. ضد الطغاه
وكان بيعشق الحياه
وكان بيكره الالم
بس الوطن كان مطلبه ... ومطلبى
اللى انقتل مش بلطجى
اللى انقتل نصف نبى
رافض يطاطى او ينحنى
لكل خاين او اجنبى
اللى انقتل مش بلطجى
اللى انقتل نصف نبى
اول رصاصه مسته
كانت ف معركة الجمل
خبى المراره ف صرخته
كله يهون لجل الوطن
والتانيه كانت معضله
طفت عيونه المبصره
لكن بصيرته زادت ايمان
خلت طريقه للأمام
مانتى يامصر مطلبه
جنة حياته ومعبده
والروح فداك تحمى حماك
شهيد يموت
والف غيره ف النضال يبتدى
اللى انقتل مش بلطجى
اللى انفتل نصف نبى
خرجت رصاصه متمغنطه .... بالغدر كانت متظبطه
عارفه طريقها وسكته ....       قلبه العفى ودنيته
الشيخ عماد حافظ كتاب رب العباد
وف أيده كانت سبحته
وقع الأمام على جبهته
ولسانه بيسبح اله
قادر يطيح بالطغاه
ولما شاف الجنه قدامه بتترسم
الشيخ عماد شهد  وابتسم
وأدن  بصوته الندى
اللى انقتل مش بلطجى
اللى انقتل نصف نبى
اللى انقتل هو الغريب
من السويس وبورسعيد
راجل حويط ... يركب الموج العفى
يرمى الشبك
 يصطاد غناوى منعشه
عربون محبة للحبيبه المدهشه
يكدب ساعات
 ... لكنه صادق ف القسم
مش اولعبان اونطجى
اللى انقتل مش بلطجى
اللى انقتل نصف نبى
اللى انقتل من سيدى جابر والمندره
من شارع المنشيه وباكوس
 والسياله ولوران وكرموز
 وزيزينا المتغندره
اسكندرانى تشم يود البحر ف ضحكته
مخلص قوى لاهل بيته وصحبته
بس بحالات
 .. شويه على سجادة صلاه
ف باحة ابو المرسى
 وشويه متسلطن  شقى
اللى انقتل مش بلطجى
اللى انقتل نصف نبى
اللى انقتل من الفلاحيين ومن الصعيد
كهل وشباب والطفل الوليد
لساك يابدوى شديد
 جايب اليسرى
ان مع العسر يسرا
شى الله ياعبد الرحيم ياقناوى
يابلد الرجال والغناوى
بلد ماتعرف المحال
جلابها يسكر ياخال
ويطهر القلب الشقى
اللى انقتل مش بلطجى
 اللى انقتل نصف نبى
اللى انقتل من اليسار واليمين
من اللى قلبه قرأن
واللى ترتيله انجيل
ومينا كان المثال
صليبه منصوب ميزان
وكمان من اللى مالوش اى دين
غيرك يامصر يدين
ياشريعه خالده ف دمنا
ياضحكة القلب الصبى
يامطلبه ... ومطلبى
اسوء مافيك ولى
اللى انقتل مش بلطجى
اللى انقتل نصف نبى
..............................................................................
 كلمات الشاعر / عربى كمال