ايوه انا كافر
مكفرش كيف
واللى ربانى عاشق لطه
ايوه انا كافر
مكفرش كيف
وف ودنى صورة الصمد
بين صحوى ونومى
يتردد صداها
ايوه انا كافر
كفران جحود
كنت نبته ف عدم
وبحق كن ف يكون
صار اللى زى وجود
فكيف ماكفرش بيكم
ياللى خليتوا دينه تجاره
مش دمى اللى ف ايديكم
بيعتوا الشهيد لأجل الأماره
اللحيه طول مترين
وزبيبه عامله علامه
والكرش تقولشى جبالين
وقلوب قاسيه حجاره
رافعين اسلامى شعار
وتقولوا هنطبق حدوده
مش أولى تستر العار
وتسد للفقر جوعه
ولا هو كلام وخلاص
والضحك ع الناس غايه
مش برضه الدين أخلاص
ورحمه ملوه هدايه
ايوه انا كافر
بس دمى معصوم
مايحله ألا اللى نشانى
وان كان على الموت دا مقسوم
قادرمن بعده يبعثنى تانى
ايوه انا كافر
بكل من قراله كتاب
وفاكر نفسه علامه
مبلغ علمه ابن عبد الوهاب
ولا عمره قرا " طوق الحمامه"
اخرتكو ابن عبد الوهاب
وانا أولى الليث بن سعد
اسلامكو لحيه وجلباب
وعندى عدل مالوش حد
.....................................
عربى كمال
المشاركات
0 التعليقات :
إرسال تعليق