قصيدة " ع الملايكه ترمى السلام "

..............................................

  الحب وحده ياحببتي /
  مش كفايه /
  الحب دا مجرد بدايه /
  الحب باب للدخول /
  مش وصول للنهايه /

  الحب دا براح / مالهوش حدود /
  الحب عين الفناء / والوجود /
  الحب زى الايمان بالكمال /
  زى ضحكة الصغار /
  زى زقزقة العصافير /
  لما فى الجنة تطير /
  وع الملايكه ترمى السلام /

  الحب سفر الثوره /
  وأية الثوار /
  الحب دعوة الأديان /
  توراه /
  وانجيل /
  وقرأن /
  الحب عين الايمان /

  الحب يعنى بتعبد اله / بيقين /
  والكره صنو الكفر /
  ولو كنت من الساجدين /

  الحب عنوان الصالحين /
  لغة الهدهد لسليمان /
  التجلى ع الجبل لموسى /
  حب الرسول لعايشه /
  طعام المطحونيين ف العيشه /

  الحب يعنى تكون جسور /
  رافض يكون مأسور / ف ساقية الحياه /
  الحب طير يغنى / ينحنى الكون لُغناه /

  الحب هدم طغيان القبيله /
  رفض العيشه المُهينه /
  يعنى الثبات ع المبدأ /
  ولو كان التمن روحك /
  يعنى تدوس ع الوجع /
  وف الضلوع تخبى نوحك /

  الحب يعنى تكفر بالجميع / الا اللى بيحبك /
  وتصلى ف رحاب الحبيب / لما ينحنى يضمك /

  الحب كفر بالخيانه /
  يعنى الخلاصه  / ماتبعيش /
  من غير حبنا  كيف نعيش /
  كيف نعيش /
  كيف نعيش /
......................................................................
                                                 عربى كمال